रब्बी अनुदान ; राज्यातील नुकसानग्रस्त शेतकऱ्यांना रब्बीच्या हंगामासाठी हेक्टरी १० हजार रुपये देण्याचा शासन निर्णय राज्य सरकारने गुरुवारी जारी केला आहे. यामध्ये सातारा, नाशिक, धुळे, नंदुरबार, जळगाव, अमरावती आणि अहिल्यानगर जिल्ह्यांचा समावेश असून नुकसानीपोटी १ हजार ७६५ कोटी २२ लाख ९२ हजार रुपयांचे वाटप करण्यात येणार आहे.
शासन निर्णयानुसार, जुलै ते सप्टेंबर २०२५ मध्ये पुणे, नाशिक आणि अमरावती विभागातील विविध जिल्ह्यात अतिवृष्टी आणि पूरामुळे बाधित शेतकऱ्यांना मदत म्हणून येत्या रब्बी हंगामासाठी बियाणे व इतर खर्चासाठी प्रति हेक्टरी १० हजार रुपये तीन हेक्टरच्या मर्यादेत देण्यात येणार आहेत. तसेच हंगामात एकवेळच मदत या नियमानुसारच ही अतिरिक्त मदत मिळणार आहे. त्यासाठी राज्य सरकारने निधीला मंजुरी दिली आहे.
मुख्यमंत्री देवेंद्र फडणवीस यांनी विशेष मदतीचं पॅकेज जाहीर करताना एनडीआरएफच्या निकषांप्रमाण नुकसान मदत देण्याचे जाहीर केले होते. तसेच रब्बी हंगामासाठी हेक्टरी १० हजार रुपये तीन हेक्टरच्या मर्यादेत देण्याचा निर्णय जाहीर केला होता. त्यानुसार राज्य सरकारने बाधित शेतकऱ्यांसाठी निधी वाटपास मंजूरी दिली आहे. ज्या शेतकऱ्यांना दोन हेक्टरच्या नुकसानीची मदत मिळाली आहे, त्याच शेतकऱ्यांना एक हेक्टरची मदत मिळणार आहे, असेही मुख्यमंत्र्यांनी स्पष्ट केले आहे.
राज्य सरकारने दिवाळीपूर्वीच सरसकट मदत देण्याचे आश्वासन दिले होते. परंतु २७ ऑक्टोबरपर्यंत केवळ ८ हजार कोटी रुपयांचे वाटप झाल्याची कबुली मुख्यमंत्र्यांनी मंत्रिमंडळ बैठकीनंतर दिली. महसूल विभागाच्या अधिकाऱ्यांनी दिवाळीच्या सुट्टीवर जात निधी वितरणास विलंब केल्याचा प्रकार समोर आला आहे. त्यामुळे प्रशासनावर मुख्यमंत्र्यांचा वचक नाही, अशी चर्चा सुरु झाली आहे. या प्रकारामुळे बहुतांश नुकसानग्रस्त शेतकऱ्यांच्या बँक खात्यावर अद्यापही पैसे जमा झाले नाहीत. तर अनेक भागात अद्यापही पंचनामे पूर्ण झाले नसल्याची माहिती समोर आली आहे.
कोणत्या जिल्ह्यासाठी किती मदत?
रब्बी हंगामातील प्रतिहेक्टरी १० हजार रुपये मदतीसाठी पुणे विभागातील सातारा जिल्ह्यासाठी ऑगस्ट ते सप्टेंबर २०२५ दरम्यानच्या नुकसानीपोटी ५ कोटी ८० लाख ३६ हजार रुपयांचा निधी मंजूर करण्यात आला आहे.
तर नाशिक विभागातील नाशिक जिल्ह्यासाठी ३०२ कोटी २८ लाख १३ हजार रुपये, धुळे जिल्ह्यासाठी ११ कोटी ६१ हजार ८२ हजार रुपये, नंदुरबार जिल्ह्यासाठी ४५ लाख ७ हजार रुपये, जळगाव जिल्ह्यासाठी २७० कोटी ९२ लाख ६५ हजार रुपये, अहिल्यानगर जिल्ह्यासाठी जुलै ते ऑगस्ट महिन्यातील नुकसानीपोटी ६२६ कोटी २६ लाख ६ हजार रुपये, आणि अमरावती विभागातील अमरावती जिल्ह्यासाठी सप्टेंबर महिन्यातील नुकसानीपोटी ५४७ कोटी ८७ लाख ८७ हजार रुपयांचा निधी वाटपास मंजूरी देण्यात आली आहे.
दरम्यान, राज्य सरकार विभागीय पातळीवरून जशा नुकसानीच्या याद्या येत आहेत, त्यानुसार नुकसानीपोटी मदत जाहीर करत असल्याचे मुख्यमंत्री देवेंद्र फडणवीस यांनी सांगितले आहे. तसेच अॅग्रीस्टॅक नोंदणी केलेल्या शेतकऱ्यांच्या बँक खात्यावर थेट पैसे जमा केले जात असून ज्यांची अॅग्रीस्टॅक नोंदणी नाही त्या शेतकऱ्यांना ईकेवायसी बंधनकारक असल्याचे मुख्यमंत्र्यांनी स्पष्ट केले आहे.
